செய்யாத குற்றத்திற்காக கடந்த 25 ஆண்டு காலத்திற்கு மேலாக வேலூர் சிறையில் வாடிவரும் பேரறிவாளன் சிறைவாசி ஒருவரால் மிகக் கடுமையாகத் தாக்கப்பட்டுள்ளார். இதை மிக வன்மையாகக் கண்டிக்கிறோம். சிறையிலேயே பாதுகாப்பற்ற நிலை இருப்பது அனைவரையும் அதிர்ச்சிக்குள்ளாக்கியிருக்கிறது. இதற்குக் காரணமானவர்கள் கண்டறியப்பட்டு கடும் நடவடிக்கைக்கு உள்ளாக்கப்பட வேண்டும்.

தமிழ்நாட்டில் உள்ள ஈழத் தமிழ் ஏதிலியர்கள் முகாம்கள் என்ற பெயரில் எவ்வித உரிமைகளும் இல்லாமலும் போதுமான உணவு மற்றும் சுகாதார வசதிகள் இல்லாமலும், குழந்தைகளுக்கு போதுமான கல்வி வசதி இல்லாமலும், வெளியே சென்று வேலை பார்க்க அனுமதிக்கப்படாமலும் சொல்லொணாத துன்பங்களுக்கு ஆளாகி வருகிறார்கள். இதற்குக் காரணம் ஐ.நா. ஏதிலியர் பட்டயத்தில் இந்திய அரசு கையெழுத்திட மறுத்து வருவதால் இவர்கள் சட்டத்திற்குப் புறம்பாக குடியேறியவர்கள் என இந்திய அரசு கூறுகிறது.