புத்த மாநாட்டில் கலந்து கொள்ள கொழும்பு செல்லவிருக்கும் பிரதமர் மோடி யாழ்ப்பாணத்திற்கும் சென்று அங்குள்ள தமிழர்களின் நிலையை நேரில் கண்டறிய வேண்டும். 2012ஆம் ஆண்டில் காமன்வெல்த் அதிபர்கள் மாநாடு நடைபெற்றபோது அதில் கலந்து கொண்ட பிரிட்டிஷ் பிரதமர் யாழ்ப்பாணம் சென்று தமிழர்களைச் சந்தித்து அவர்களின் குறைகளைக் கேட்டறிந்து இலங்கை அதிபரிடம் தனது கண்டனத்தை நேரில் தெரிவித்தார்.

2300 ஆண்டுகளுக்கு முற்பட்ட வைகைக் கரை நாகரிகம் குறித்த அகழ்வாராய்ச்சிகளை தடுத்து நிறுத்த மத்திய பா.ச.க. அரசு செய்துவரும் முயற்சிகளுக்கு எதிரான மாபெரும் கண்டன ஆர்ப்பாட்டம் மதுரையில் 10-4-2017 அன்று காலை 10 மணி அளவில் புதூர் பேருந்து நிலையத்தில் நடைபெற்றது.

இந்த ஆர்ப்பாட்டத்திற்கு தமிழர் தேசிய முன்னணியின் தலைவர் பழ. நெடுமாறன் தலைமை வகித்தார். இந்தியக் கம்யூனிஸ்டுக் கட்சியின் மூத்தத் தலைவர்களில் ஒருவரான தா. பாண்டியன் கலந்துகொண்டு வாழ்த்துரை நிகழ்த்தினார்.